| تبليغات | X |
سیاوەش كەسرایی
و/ ئەمین گەردیگلانی(بۆكان)
شەوگارمان چ پڕ شكۆیە
كاتێك گوللە
سینگی سڕی خاڵكوت دەكەن
دڵی ئێمەش
دڵە پەرۆشەكەی ئێمەش
لەهەر دوو سەری شەوەوە
بانگی بەرزی بژی وڵات
بەیەكەوە گرێ دەدەن.
شەوگارمان چ پڕ شكۆیە
كاتێك تاریكی یەكیەتی دەدا بە شار.
شەوگارمان چ پڕشكۆیە
كاتێك كە دەستێكی نەناس
دەرگا لەسەر تێكۆشەرێك دەكاتەوە و
لە داڵانێكی تاریكا
حەز و دڵەكوتە دەگوشن باسكی یەكتر.
شەوگارمان چ پڕشكۆیە
ئەو كاتەی كە جەندرمەكان
لە گەمارۆی چاوی خەو لێ زڕاوماندا
یەخسیر ماون.
شەوی ئێمە
چەند خەماوی و پڕشكۆیە
كاتێك
هاوار و ئەستێرە
لە ئاسمانا تێك دەهاڵێن.
تارماییش لە سەربانەكان
بە بێدەنگی
لە پرسەیەكی سادە دان.
لە زەردەپەر تا كازیوە
شەوڕەوەكان
لە كۆڵانا
دڵمان دەست بە دەست دەگێڕن.
خەوێكی بێهوودەش
بەسەر سەری شارەوە دەگەڕێ.
كوژراو بەیانی نابینن
بەڵام، بەڵام
«ئاسۆ ڕوونە»
*شەبەقی ناز*
کووچە چۆڵ و شەبەقی نازێ لە پەنجێرە تکا
ئاسمان شەق بوو تکەی شەونمی ئەستێرە تکا
شەونمی واژە لەسەر کۆشی خەیاڵ بوونە شێعر
کە تریفەی بزە لەو لێوە گوڵاودێرە تکا
وتم: ئەی شۆخی بەدەو بۆخەمی تۆ بوومە هەور
وەرە ئەم تک تکی فرمێسکمە بژمێرە، تکا
ئاوری بەرداوەتە دڵ پێلی گڕهاوێژی نیگات
بکە ڕەحمێک و بە تاڤگەی قژەوە بێرە تکا
مەمکەکەت بگرە لەبەر حاکمی ئەشقی دڵڕەق
بۆ گرێ دانی دڵ و وەسڵی ئەوین خێرە، تکا
سەرم هەڵگرت و لەبەر دەرکی ئەوینم دانا
دایە بەر شەق وتی پێم: باوی نییە لێرە تکا
من نیگام برسییە بۆ دینی گوڵی ڕووت و کەچی
لە نیگات شەونمی ماچی ئەوی چاو تێرە تکا
بوومە تاوێکی سڕی کەوتوو لەنێو کووچەکەتان
چابوو تیرێژی بزەت هات و لەپەنجێرە تکا.
*پایزی 1386*
*خاسە کەو*
خاسەکەوێکی بە گەرووی ئاڵەوە
خۆت لە قەفەس نا بە خەت و خاڵەوە
ماڵەوە جێ بێڵە شەقام چاوەڕێن
شادی وەخە ڕۆحی کوڕ و کاڵەوە
گۆمی جەماوەرورە بابشڵەقێ
بەوڕەشەبای بەژن و قەد و شاڵەوە
با بشکێنێ شنە ئاڵای کەزیت
مەقنەعەکەت تووڕ دە بەدەسماڵەوە
گڕدە لەچەک، پەرچەمی تۆ خۆی گڕی،
پاقژی نەورۆزە بەدەم یاڵەوە
تامەزرۆی نەرمە شنەی رەوتی تۆن
لاو و بەساڵاچوو و بە منداڵەوە
ڕوون کەرەوەی چاو و دڵن قۆڵ و پۆز
مەیخەرە ژێر ئەو سڕ و سیپاڵەوە
*تانووت*
خەم هات و نیگای شاری لەباڕووتەوە پێچام
بۆوەی نەفڕم بەژنی لەتابووتەوە پێچام
کوێستان بەڵەک و، دیلی ڕنوو باڵی گەزیزەم
داوێ کەوی ڕۆحی لەسیاسووتەوە پێچام
من دەردی دڵی گەل گڕی بەردایە هەناوم
گەل هەستی لەدوودەی سڕی تانووتەوە پێچام
*
شۆخێ بەنیگایێکی ڕفاندم دڵ و، پێمگوت:
مەمنوون کە لە ئاونگی گوڵی ڕووتەوە پێچام
توورن گوڵم ئەو دوندی لەسەر سینەتە بۆیە
ئەشقێکی خودایی دڵی لەو جووتەوە پێچام
سووتا بەترووسکێکی ئەوینت دڵ و جەستەم
بۆت بوومە کل و وەسمە لەپێڵووتەوە پێچام
ئەشکەوتی دڵت کردە سیاچاڵی و لەوێدا
پێست و ڕەگی جەستەت لەسەرەبزووتەوە پێچام
باگێژی هەناسەم هەڵیکرد، لەچکەکەتی برد
شەو بردی دڵم، یا لەخەمی مووتەوە پێچام؟!
